'El Pastelero' aceptará a súa primera condena, pero non por narcotráfico, senón por delito fiscal
Por Natalia Puga
Óscar Manuel Rial Iglesias, coñecido como 'El Pastelero' e considerado polas forzas de seguridade como "un dos maiores narcotraficantes actualmente en activo" de Galicia, terá a partir do próximo venres 18 de marzo a súa primeira condena xudicial. Detido e xulgado con anterioridade en relación co tráfico de drogas, saíra absolto, pero agora será condenado, coa súa conformidade, por un delito fiscal, en concreto, por un delito contra a Facenda Pública.
'El Pastelero', coñecido por ese nome en refrencia á súa profesión legal, sentará no banco dos acusado do Xulgado do Penal número 2 de Pontevedra e previsiblemente conformarase cun acordo de conformidade alcanzado previamente coa Fiscalía e a Avogacía do Estado en función do cal cumprirá a pena de seis meses de prisión e pagará unha multa de 248.009,73 euros, con 50 días de privación de liberdade en caso de falta de pagamento.
Ademais, o procesado perderá a posibilidade de obter subvencións ou axudas públicas e o dereito para gozar dos beneficios ou incentivos fiscais ou da seguridade social polo período de dous anos e indemnizará á Axencia Tributaria con 381.553,44 euros pola cota da Seguridade Social que lle defraudou e con outros 59.121,32 euros polos intereses.
Se na sala do xuízo cúmprese o guión previsto, Óscar Rial aceptará que no exercicio económico 2011 presentou unha declaración polo imposto da renda das persoas físicas na que declarou unha base liquidable de 985,27 euros e unha cota de 0 euros, pero as comprobacións realizadas permitiron pescudar que a base liquidable era de 872.985,27 euros e a cota para pagar, que resultou defraudada, debería ser de 381.553,44 euros.
O acusado consignou para o pago das responsabilidades patrimoniais 381.553,44 euros pola cota tributaria 59.121,32 euros polos intereses de demora e 248.009,73 euros para o pago da multa, de modo que se lle aplicou, como circunstancia atenuante, a reparación do dano.
Óscar Rial Iglesias, natural de Vilagarcía de Arousa de 43 anos, será xulgado nesta ocasión por un delito polo que a Brigada de Branqueo da Unidade de Delitos Económicos e Fiscais (UDEF) da Policía Nacional o detivera en decembro de 2014 xunto a outras sete persoas para as que se pide o arquivo da causa. No seu caso, tras pasar pouco máis dun mes despois en prisión provisional imputado por un delito de branqueo de capitais e delito fiscal, saíu tras pagar unha fianza de 200.000 euros e, posteriormente, a causa seguiuse tan só por delito fiscal, ao non poder demostrarse o suposto branqueo de capitais nin a existencia da rede que habería blanqueado 1,1 millóns de euros.
'El Pastelero' foi detido por primeira vez no ano 2008 en relación co transporte de 3,6 toneladas de cocaína no pesqueiro San Miguel como suposto lider dunha rede que movía anualmente 10 toneladas de cocaína desde Colombia e haxix desde Marrocos e que lavaba o diñeiro procedente desta actividade ilíctia. Foi xulgado en 2013 na Audiencia Nacional e absolto.
Relacionadas:
-
'El Pastelero' deixa de ser un dos capos máis escorregadizo: estrea condena por delito fiscal
Por Redacción |
-
'El Pastelero' sae da cárcel tras pagar unha fianza de 200.000 euros
Por Redacción |
-
'El Pastelero' poderá eludir a prisión por branqueo de capitais cunha fianza de 200.000 euros
Por Natalia Puga |
-
'El Pastelero' ingresa en prisión por branqueo de capitais
Por Natalia Puga |
-
Cae 'El Pastelero' nunha operación contra o branqueo de capitais en Arousa
Por Redacción |