Os traballos na pista entre Sabarís e Ferreiros costarán 241.000 euros
Por Redacción
O Concello iniciará as obras de arranxo da pista que vai dende Sabarís até Ferreiros nas próximas semanas, unha obra que suporá un investimento de 241.000 euros. A veciñanza coñeceu a nova por boca da concelleira Pilar Comesaña na última reunión do Consello parroquial de Campañó, do que forman parte a comunidade de montes, a asociación veciñal Santo Paio, a asociación Cultural, a asociación deportiva xuvenil de Campañó e a ANPA do colexio da parroquia.
A concelleira anuncioulles o compromiso do Concello de facer a remodelación da praza de Ferreiros neste mesmo ano. Ademais de outras actuacións de mellora na parroquia a longo do 2016 como a recuperación e acondicionamento da senda que vai dende Barragáns a Casal do Mendo, a limpeza de varias fontes e o bacheado da parroquia.
Os representantes veciñais e sociais presentes no Consello parroquial de Campañó aproveitaron a xuntanza para facer suxestións co fin de mellorar entre todos a parroquia.
A concelleira delegada de Campañó agradeceu a “boa disposición” a axudar dos veciños e atención que lle prestan sempre que vai a propor ou anunciar proxectos ou actuacións.