Pontevedra gastará millón e medio de euros en agasallos para os pais, menos que o día da nai
Por Redacción
Será por aquilo de que "nai non hai máis que unha..." que as mamás reciben máis agasallos que os pais. Segundo algunhas enquisas de satisfacción que representan ao sector comercial, o gasto da poboación no Día do Pai será inferior ata nun 31 por cento que con respecto ao Día da Nai. Os agasallos máis desexados son as experiencias, a electrónica e as comidas familiares.
A Federación Provincial de Comercio avanza que na provincia de Pontevedra facturarase algo máis de 12 millóns de euros para o Día do Pai 2016, sendo o gasto medio por persoa estimado de ao redor de 32,47 euros.
Os datos obtivéronse entre os días 01 e 09 de marzo de 2016, a través de novecentas enquisas telefónicas a cidadáns da provincia de Pontevedra.
Segundo os distintos tramos de idade nas persoas de entre 15 e 29 anos: o gasto medio é de 22,50 euros, efectuando agasallos o 68% dos enquisados.
Nos cidadáns de entre 30 e 49 anos: o gasto medio é de 40,15 euros, efectuando agasallos o 60% dos enquisados.
De 50 anos en diante: o gasto medio é de 35,50 euros, efectuando agasallos o 12 % dos enquisados.
O gasto estimado no municipio de Pontevedra supera o millón e medio de euros, mentres que en Vilagarcía é de 525.000 euros.
A roupa e os complementos son o máis regalado, principalmente as típicas gravatas, camisas. Entre o máis regalado tamén están os artigos electrónicos, seguido polos artigos de perfumería e de aseo, os libros e finalmente, discos e películas.
COMIDA FAMILIAR
Este ano o día do pai cae en sábado, polo que o 19 de marzo, moitas familias aproveitarán para celebralo cunha comida familiar nalgún dos restaurantes da provincia de Pontevedra, cun gasto medio previsto por persoa duns 18 euros.
Tamén están as familias que celebrarán comidas familiares nos seus domicilios, cun gasto medio estimado por persoa de oito euros.