Un turismo envorca e arde en Tomeza deixando varios feridos leves
Por Redacción
Un coche envorcaba ao saír da vía no lugar de Lusquiños, nas proximidades ao lavadoiro, na parroquia pontevedresa de Tomeza ao redor das 19.00 horas da tarde deste luns 7 de marzo.
Segundo informou o servizo de Emerxencias do 112, un particular alertaba do accidente e sinalaba que o vehículo se atopaba ardendo pero sen que se atopasen persoas no seu interior. Con todo, os ocupantes sufriron feridas leves.
Ata o lugar trasladáronse efectivos do servizo de Urxencias Médicas, os bombeiros de Pontevedra, a Garda Civil de Tráfico e Protección Civil. Os feridos foron trasladados a un centro hospitalario da cidade para levar a cabo a súa observación. A Garda Civil de Tráfico viuse obrigada a cortar o tránsito de vehículos na estrada.