Poio adecenta a ruta dos muíños de Samieira e o paseo entre as praias de Covelo e Laño
![Redacción](/web/cache/scene/uploads/xornalistas/foto/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/506490f5a15ce-c6ku5opwb5qbtijalxd0_reasonably_small.jpeg)
Por Redacción
O Concello de Poio realizou nos últimos días unha actuación intensiva para eliminar a maleza e podar as árbores de dúas das zonas de paseo máis populares do municipio, a ruta dos muíños de Samieira e o paseo que vai desde a praia do Covelo ata a do Laño.
En canto á ruta dos muíños de Samieira, procedeuse á corta da abundante maleza que ateigaba ambas marxes do río Freiría, no tramo comprendido entre a praza de Alfredo Romay Besada e a desembocadura na praia do Laño.
Neste treito encóntrase, recorda o concelleiro de Medio Ambiente, Xosé Anxo Lodeiro, un dos vinte e tres muíños que integran a ruta, en concreto o denominado "Muíño de Cubo de Abaixo", de aí a importancia de non descoidar o seu estado de conservación.
No que respecta ao paseo entre as praias de Covelo e Laño, as actuacións centráronse na poda das numerosas árbores que se dispoñen ó borde do mesmo e que, nalgúns casos, xa desenvolveran ramas de gran porte que invadían a zona peonil dificultando o tránsito normal.
Co gallo de non desvirtuar o entorno natural da zona, optouse por unha poda moderada, que se limita ao estritamente necesario para preservar a funcionalidade do paseo.