A Lanzada, destino para 2.200 nenos pontevedreses a partir do 19 de xuño
Por Redacción
O Centro de Vacacións da Lanzada volverá converterse o próximo verán no destino para os nenos máis aventureiros da provincia. Un total de 2.200 rapaces, nacidos entre os anos 2003 e 2008, serán os beneficiarios do programa Depo Aventura A Lanzada 2016 cuxas bases aprobou a Xunta de Goberno da Deputación de Pontevedra.
Esta actuación, enmarcada no servizo de cohesión social e xuventude e para a que se destinan 235.000 euros, ten por finalidade a promoción e organización de actividades cun compoñente educativo destinada ao lecer.
Por vez primeira, grazas a un convenio asinado coa Fundación La Caixa, resérvanse 300 prazas gratuítas para menores en situación ou risco de exclusión social, dando a oportunidade de participación a menores pertencentes a familias con escasos recursos económicos.
Así, das 2.200 prazas totais, distribuídas en 200 prazas por cada unha das once quendas de sete días de duración entre o 19 de xuño e o 3 de setembro, 300 serán de balde e estarán destinadas a 52 nenos do Centro Príncipe Felipe e a catro nenos de cada un dos concellos da provincia (outras 248).
As prazas serán distribuídas en función do número de habitantes dos concellos. Así, os concellos de menos de 3.000 habitantes terán 10 prazas e o resto irá crecendo de forma sucesiva ata os 200 que se reservan para Pontevedra e as 300 para Vigo.
A asignación das prazas realizarase mediante sorteo público que se rexerá por un algoritmo informático.
A través de Depo Aventura A Lanzada 2016, a institución provincial ofrece a posibilidade de que os mozos empreguen as súas vacacións de verán participando en actividades lúdicas, culturais, deportivas e formativas que contribúan ó seu enriquecemento persoal e ó coñecemento doutros lugares fóra da súa contorna.
En concreto, desenvolveranse actividades relacionadas coa natureza, teatro, contacontos, baile, deportes, unha excursión á Illa de Ons, actividades ó aire libre, artísticas e xogos co obxectivo de ensinar os rapaces a desenvolverse nun medio non habitual, potenciando a súa maduración, desenvolvendo a sociabilidade, inculcando hábitos hixiénicos, alimenticios e de exercicio físico e fomentando o respecto polo medio ambiente e a conservación da natureza.
Os nenos aloxaranse en tendas de campaña en réxime de pensión completa e estarán atendidos por un equipo técnico formado por persoal especializado en animación sociocultural e actividades de lecer e tempo libre. Ademais, a institución provincial aportará todo o material necesario para o desenvolvemento das actividades, atención sanitaria e seguro de accidentes.
O prezo será de 83,60 euros por praza, tendo os membros de familia numerosa un desconto do 20%. Os interesados deberán presentar a solicitude e documentación a partir do día seguinte ao da publicación no Boletín Oficial da Provincia e ata o 1 de abril.