Fiscalía pide 7 anos e medio de prisión para un agresor sexual encapuchado
Por Redacción
A sección cuarta da Audiencia provincial de Pontevedra xulgará o xoves 31 de xaneiro un veciño de Cangas que presuntamente tentou agredir sexualmente a dúas mulleres asaltándoas na rúa coa cabeza cuberta cun pasamontañas.
O acusado R.C.C. ten antecedentes penais ao ser condenado no ano 2008 por un delito de ameazas no ámbito familiar.
Os feitos polos que se sentará de novo no banco dos acusados tiveron lugar o 28 de xaneiro do ano 2011, sobre as sete e media da tarde no Camiño Sierra Naciente, na localidade de Cangas. Segundo a fiscalía "con ánimo libidinoso, ocultando o seu rostro cun pasamontañas", abordou por detrás a unha muller tirándoa ao chan "onde tras baixarlle a saia e a faixa ata os xeonllos tocoulle os seus xenitais" mentres a vítima forcexeaba e berraba, sendo auxiliada por unha veciña do lugar.
O segundo suceso polo que o lle acusa o Ministerio público tivo lugar o día 23 de marzo dese mesmo ano no portal dun edificio de Cangas, "con idéntico propósito, aproveitando a escuridade, portando un pasamontañas" agarrou fortemente da caluga á outra muller mentres introducía o outro brazo pola saia "tratando de abrirlle as pernas para baixarlle a saia e a roupa interior e intentar tocarlle a parte xenital", non chegando a conseguilo polos berros da vítima.
Como consecuencia destes feitos as dúas mulleres sufriron pequenas lesións.
A raíz destes feitos o acusado atópase en prisión provisional desde o 25 de marzo de 2011.
A fiscalía contempla dous delitos de agresión sexual, un deles en grado de tentativa, así como dúas faltas de lesións. Concorren as agravantes de alevosía e de disfraz. Solicita un total de sete anos e seis meses de prisión.
Ademais piden que se lle impoña a prohibición de achegarse ás agredidas a unha distancia inferior a 500 metros, durante dez anos no caso da primeira vítima e cinco anos no da segunda.
En canto á responsabilidade civil solicita a fiscalía que o acusado indemnice con 300 euros polas lesións e 5.000 polo dano moral á primeira vítima e 210 euros por lesións e 3.000 por dano moral á segunda muller.