Máis de 1.300 persoas participarán no desfile de Entroido de Ponte Caldelas
Por Redacción
O Concello de Ponte Caldelas espera que o desfilde de Entroido que se desenvolverá este venres 19 a partir das 21.00 horas sexa o máis multitudinario da súa historia xa que máis de 1.300 persoas inscribíronse, 9 comparsas e 10 grupos chegados desde lugares como Campo Lameiro, Monte Porreiro, Bora, Poio, Marín, Vilaboa, de Pontevedra cidade, A Lama, Soutomaior, Vigo, Sanxenxo, Meis e Ponte Caldelas.
O desfile iniciarase nas inmediacións do pavillón municipal de deportes, en Chan da Barcia, e tras percorrer as principais rúas do centro urbano de Ponte Caldelas finalizará na Alameda onde terá lugar a entrega de premios que estarán amenizados por unha gran verbena popular a cargo da orquestra Miramar.
Este ano increméntanse de tres a cinco os premios nas categorías de comparsas e grupos coa intención de que o xurado poida ampliar o número de galardóns e compensacións económicas aos participantes.
Os participantes poderán optar aos premios de comparsas, grupos, disfrace individual ou por parellas e á comparsa infantil.
Está previsto un operativo especial de tráfico para garantir o desenvolvemento deste desfile. A partir das 19.00 horas non se poderá estacionar na praza de Fornelos de Montes, detrás do Centro Cultural, nin na contorna da praza de Abastos, praza de España, avenida de Vigo, rúa da Ponte, José López Boullosa, Concepción Arenal e Rosalía de Castro.
Se prohibe a circulación por José López Boullosa a partir das 19.00 horas e tampouco poderán pasar vehículos a partir das 21.00 horas por todas as rúas nas que se impide estacionar ata que finalice o desfile.