A semana empeza con tempo frío e inestable
Por Redacción
Durante a xornada deste luns persistirá a inestabilidade atmosférica sobre Galicia. Así, espéranse ceos con intervalos nubrados e chuvascos, que irán remitindo polas Rías Baixas ao longo do día e serán de neve por encima dos 500-700 metros.
Segundo a información facilitada por de Meteogalicia as temperaturas mínimas sufrirán un lixeiro descenso, con xeadas en puntos do interior; mentres que as máximas non experimentarán cambios.
Pola súa banda, os ventos soprarán de compoñente norte, fortes no litoral e zonas altas; e moderados no resto, diminuíndo cara á noite.
Así mesmo, tal e como precisou Meteogalicia, prosegue o temporal no mar con ventos de forza sete-oito e ondas superiores aos seis metros.
MARTES
Na xornada do martes Galicia queda momentáneamente baixo influencia anticiclónica con un tempo máis estable. Predominarán os ceos alternando nubes e claros, con máis claros no sur e algúns chuvascos illados no litoral norte pola mañá.
As temperaturas mínimas descenderán lixeiramente, con xeadas en puntos do interior e zonas altas, mentres que as máximas non terán cambios, manténdose a sensación térmica de frío. Os ventos soprarán de compoñente norte frouxos, quedando de dirección variable pola noite.
MERCORES
Durante a xornada do mércores Galicia queda novamente baixo a influencia das borrascas atlánticas, cunha fronte que se desprazará con rapidez a partir das horas centrais do día. Pola mañá predominarán os intervalos anubrados, con máis nubes polo oeste onde comezarán a aparecer as precipitacións que se estenderán a toda a Comunidade pola tarde; xa pola noite a cota de neve situarase sobre os 700-800 metros.
As temperaturas sufrirán ascensos que será máis notable nas mínimas. Os ventos soprarán do sudoeste frouxos con intervalos moderados no litoral pola mañá, rolando progresivamente ao noroeste e acadando intervalos fortes pola noite.