Marea solicita a creación dun regulamento para controlar as actividades de RedeAxuda
Por Redacción
O grupo de Marea Pontevera presentou unha proposición, para o seu debate no Pleno Municipal, na que solicita unha revisión do proxecto de RedeAxuda e a creación dun regulamento que especifique as súas funcións.
Na actualidade, aseguran, esta rede "carece de entidade xurídica e regulamento de funcionamento que determine, baixo os principios de democracia, participación e transparencia, o órgano xestor da mesma ou os parámetros de organización interna".
RedeAxuda é unha plataforma creada para resolver problemas de coordinación e duplicidade de recursos entra as entidades sociais que operan na cidade, estando integrada actualmente por: Fundación Secretariado Xitano, Asociación Rexudir Provincial, Fundación Amigos de Galicia, Fundación Meniños, Cáritas Interparroquial, Proxecto Home Galicia, Calor e Café, Club de Leóns e Comedor de San Francisco.
Marea criticou ademais os criterios de acceso á rede, ao non permitiron a inclusión da Asociación Boa Vida despois de solicitalo por escrito por "non cumprir os requisitos", aseguraron.