Podemos pide máis recursos para atender os máis de 900 novos casos de cancro ao ano
Por Redacción
Este 4 de febreiro conmemórase o Día Mundial do Cancro. Con tal motivo Podemos Pontevedra fíxose eco da data e reclama maiores investimentos e atencións para os enfermos.
Os datos que achega indican que o Hospital Provincial de Pontevedra recibe máis de 900 novos pacientes cada ano. Engade que a demanda de atención social duplicouse no últimos cinco anos, pasando de 500 demandas en 2010 a 1.000 en 2015.
A pesar destas cifras "os recursos públicos para atendelos son cada vez menores" ata o extremo de que "persoas desempregadas con cancro, aseguran que os seus recursos non lles chegan para afrontar a enfermidade e moitos pacientes teñen que deixar a súa medicación".
Así, Podemos Pontevedra reclama que se incremente o investimento en prevención, investigación, recursos da atención económica, social, sanitaria e dos coidados. Ao mesmo tempo, inciden no imprescindible traballo que realizan as asociacións de loita contra o cancro e denuncian que estas entidades han de asumir unha gran porcentaxe dos casos ante a falta de atención das institucións.