Cambiar a cuberta do colexio Telleiro foi máis caro do previsto
Por Redacción
A reparación da cuberta traseira do patio do colexio Telleiro, en Noalla, concluíu xa de forma que os escolares deste centro dispoñerán dunha zona de xogo protexida e segura durante as xornadas de choiva. O orzamento inicial destinado a esta actuación pola Concellería de Educación, de preto de 10.000 euros, viuse finalmente incrementado noutros 3.000 debido á avanzada deterioración da estrutura.
E é que o armazón metálico lateral atopábase totalmente oxidado e danado e foi necesario substituílo por outro soporte lateral que aguantase o panel sándwich que foi instalado agora.
Esta modificación implicou un lixeiro atraso na finalización dos traballos, polo que a concelleira de Educación, Sandra Fernández Agraso, agradece a colaboración atopada tanto na dirección do centro escolar, como no persoal de Conserxería, así como a comprensión dos pais, que contribuíron a realizar a obra nas mellores condicións posibles.
A directiva da ANPA do Telleiro remitiu esta mércores unha mensaxe de agradecemento á edil de Educación porque "sempre estivo disposta a buscar unha solución, a atopar os cartos para realizala obra e a desbloquear canta traba aparecía, facendo innumerables chamadas e visitas cando facía falla. As nosas mostras de agradecemento tamén van á conserxería, claustro e á dirección do CEIP por coordinar tan axeitadamente as obras coa rutina lectiva".
E é que a substitución da cuberta do patio do colexio é unha obra que o goberno local entende que debeu de ser asumida pola Consellería de Educación, dando resposta a unha demanda reiterada durante os últimos anos polos pais de alumnos e pola comunidade educativa de Noalla.
Pero a Consellería non habilitou partida tampouco este ano para este investimento polo que Fernández Agraso priorizou a seguridade dos escolares e decidiu asumir con fondos municipais a substitución da cuberta.