Bueu busca a colaboración da Universidade para destinar os montes comunais a proxectos ecolóxicos
Por Redacción
O Concello de Bueu está a traballar nunha posible colaboración coa Universidade de Vigo de cara ao aproveitamento de montes comunais para destinalos a proxectos sostibles e ecolóxicos. Estaría respaldado por unha nova ordenanza de aproveitamento de montes comunais non clasificados que ten pendente de aprobación o goberno local.
Para avanzar nese camiño, a concelleira de Promoción Económica e Turismo, Silvia Carballo; e a técnica de desenvolvemento local e emprego, Sonia Cabodevila, reuníronse este mércores con investigadores do departamento de Bioloxía Vexetal e Ciencia do Solo da Universidade de Vigo. Acudiron a este primeira toma de contacto a investigadora da área de edafoloxía Emma Covelo, a experta en agricultura ecolóxica Nuria Pedrol e dous estudantes que están preparando a súa tese
Silvia Carballo indicou, a través dun comunicado, que o obxectivo é "potenciar o noso, pero para iso precisamos o apoio de especialistas en xestión sostible". Buscando a interacción de usos, os proxectos que se poden implantar poderán ser sociais, económicos, ambientais e turísticos. E nese sentido, este grupo de investigadores visitarán as parcelas para ver in situ o tipo de solo e plantación, e demais características para identificar o tipo de proxecto que sería máis viable nos diversos espazos.
A nova ordenanza pretende ser un instrumento legal para darlle cobertura aos usos e aproveitamentos dos montes comunais e acoller iniciativas que avoguen polo desenvolvemento sostible, a autonomía alimentaria e o aproveitamento da superficie forestal. O que buscan é "relacionar os mercados ecolóxicos coas rutas e o medio ambiente, e crear sinerxías".