O parking do porto deportivo gasta un 66% menos en luz coa iluminación led
Por Redacción
Unha redución do 66% na factura da luz. É o aforro que logrou o parking de Nauta no porto deportivo de Sanxenxo, no primeiro mes que o consumo eléctrico realizouse coas renovadas luminarias led.
Dos 1.269,07 euros facturados no mes de novembro, pásase aos 561,55 euros de xaneiro, o que confirma o aforro previsto.
A redución deixouse sentir lixeiramente xa no mes de decembro, no que a factura baixou a 1.089,77 euros, ao producirse o cambio o 28. Os escasos días nos que se utilizou o novo sistema deixaron pouca marxe para constatar un aforro que se evidenciou en xaneiro.
Os Kw/h consumidos pasaron dos 11.537 do mes de novembro aos 5.105 de xaneiro, o que confirma o aforro previsto polo Consello de Administración de Nauta cando decidiu a substitución das luminarias.
Os novos datos de lectura confirman un aforro medio mensual no aparcadoiro de Nauta de 700 euros, que superará os 8.500 euros no cómputo anual.
O investimento realizado na substitución das luminarias foi de 6.823,96 euros, máis IVE.
Incluíu a substitución de 258 tubos led de 18 watts para a iluminación xeral do aparcadoiro, 124 tubos led de 10 watts para oficina e cartelería, 13 downlight led para os aseos, seis proxectores led para o carril de entrada e saída do aparcadoiro, dez paneis led para os falsos teitos e 14 lámpadas led que se instalaron nas subidas peonís á praza interior e exterior.