Os colexios pontevedreses elixen entre un catálogo de 43 actividades municipais este trimestre
Por Redacción
A Concellaría de Educación do Concello de Pontevedra oferta aos centros de ensino de Primaria e Secundaria do municipio unha programación con 43 actividades de diferentes departamentos.
Segundo informou o Concello a través dun comunicado, este departamento elaborou este curso por primeira vez un catálogo con toda a oferta educativa municipal para informar a todos os centros do programa de actividades de tal xeito que eles puidesen escoller os actos que quixesen segundo os seus obxectivos docentes do curso e tamén facer unha axenda escolar destas actividades complementarias que oferta o Concello.
O Concello renova esta proposta trimestralmente, incorporando novas iniciativas dos departamentos a medida que se van elaborando. O catálogo inclúe actividades propias da Concellaría de Educación e tamén de normalización lingüística, medio ambiente natural, prevención de condutas adictivas, voluntariado, patrimonio histórico, Turismo, policía (Educación viaria) ou bombeiros (concurso de debuxos).
O catálogo leva incorporado un calendario cos meses que se imparten as actividades e tamén unha descrición de cada unha das propostas. O obxectivo desta iniciativa, ademais de ordenar o catálogo municipal de actividades educativas, é crear unha base estatística para coñecer a implantación destas actividades nos centros de ensino.