Denuncian roubos e actos vandálicos en vehículos estacionados en Campelo
Por Redacción
A concelleira e voceira do PP para Campelo, Natividad Torres Balea, trasladou este mércores as queixas e a "gran intranquilidade" transmitida por varios veciños de Campelo e advertiu dunha "vaga de roubos e actos de vandalismo nos vehículos estacionados en Campelo".
Segundo a información achegada polo Partido Popular, neste último mes producíronse unha decena de roubos e actos vandálicos de distinta consideración. A edil popular explicou que hai veciños que atoparon o coche con importantes danos na carrozaría, e outros aos que lle levaron as defensas ou parte da instalación eléctrica.
As características de Campelo fan que case non haxa garaxes e outros aparcadoiros, de modo que a meirande parte dos coches 'durmen' na rúa.
"Desde logo, non son casos aillados, pois supoñen un gasto importante para as vítimas", dixo Torres que animou a todos os afectados a que presenten denuncia, "cómpre que os corpos e forzas de seguridad teñan toda a información e probas necesarias, pero tamén que lle dean a importancia que merece".
A concelleira popular dirixiuse especificamente ao Concello, a quen demandou "un reforzo da presenza da policía local en Campelo", e unha atención especial ás denuncias dos veciños xa que "algúns dos afectados aseguran que chamaron á Policía Local pero non recibiron asistencia".
O PP solicitou que se tomen as "medidas necesarias" para evitar máis roubos e actos vandálicos.