Comezan as obras para mellorar a accesibilidade ao colexio de Praceres
Por Redacción
O Concello de Pontevedra comezará este mércores 27 os traballos de seguridade viaria e de accesibilidade na contorna do centro de educación de Praceres onde está previsto facer unha reordenación de tráfico, creación de estacionamento, acougado de tráfico, eliminación de barreiras e creación de espazos seguros co obxectivo de que os escolares poidan asistir ás clases.
Está prevista a construción dunha beirarrúa na marxe esquerda da vía, que rodea a praza. Ao mesmo tempo o viario pasará de dous carrís a un só, mantendo o sentido do tráfico de Marín a Pontevedra. A eliminación do carril permitirá ampliar a beirarrúa na marxe esquerda e tamén crear un espazo de estacionamento para crear o maior número de prazas posibles.
No lado da vía do tren, tamén está prevista a eliminación dun parterre, segundo informa o Concello de Pontevedra, para ampliar a beirarrúa e solucionar o problema de augas que se rexistra nesta zona. A actuación completarase coa instalación de pasos de peóns elevados e a eliminación de barreiras na praza.