300 actividades para as Noites Abertas con máis igualdade
Por Mónica Patxot
Este venres 29 de xaneiro volve unha nova edición de Noites Abertas, que leva xa 17 anos en funcionamento e que contan cun orzamento de 112.000 euros, dos que máis de 70.000 proceden, a través do ministerio de Sanidade, de comisos a narcotraficantes.
Ata o sábado 30 de abril desenvolveranse máis de 300 actividades en espazos como, entre outros, o colexio Froebel, o Teatro Principal ou o Local de Música. 19 persoas encárganse da organización e este ano incorpóranse seis integrantes para desenvolver unha comisión que garanta a igualdade de xénero nas actividades e no trato por parte dos monitores, segundo explicou o concelleiro Demetrio Gómez durante a presentación destas actividades quérense evitar erros cometidos en anos anteriores nos que, nalgunha actividade, existían modelos distintos para mulleres e para homes.
Os mozos, menores con idades comprendidas entre os 12 e os 30 anos, poden participar nestas actividades que comezarán este venres no Froebel a partir das 20.00 horas con esgrima, amigurumis, cociña marroquí, tenis de mesa, obradoiros de ligue e sedución, videomaratón de Noites Abertas, TeleNoites, elaboración de xabón ecolóxico e unha divertida sesión de Quidditch Muggle, o deporte de Harry Potter. Na Casa Azul a partir das 20.00 horas desenvolveranse artes marciais, elaboración de sobremesas e breakdance mentres que no Local de Música poñeranse en marcha actividades de iniciación ao rap e de percusión tradicional.
Serán as primeiras iniciativas, propostas todas polos propios mozos, que se desenvolverán durante os próximos meses nos que, entre outras opcións, tamén se poderá aprender a xogar á billarda, a diferentes deportes, á zumba, a realizar aturuxos de distintos países do mundo ou papiroflexia.
Algunhas actividades requiren inscrición previa, que se pode realizar a través de xuventude@pontevedra.eu e todas son gratuítas. A organización tamén estableceu unha aplicación para dispositivos móbiles para que os interesados en participar poidan coñecer as diferentes propostas.
Relacionadas:
-
O lecer ten xénero
Por Oskar Viéitez |
-
Unha festa o sábado 30 poñerá o peche a Noites Abertas
Por Redacción |
-
Baile, clases de cociña ou 'quiddith' para unha primeira e animada fin de semana de Noites Abertas
Por Diego Torrado |
-
As Noites Abertas achéganse aos 110.000 euros de orzamento para 2016
Por Redacción |
-
Noites Abertas recibe 166 propostas de actividades para a súa edición de 2016
Por Redacción |
-
Xa están en marcha as Noites Abertas 2016
Por Redacción |