O lama Gueshe Tenzing Tamding enche o Centro Cultural de Ponte Caldelas
Por Redacción
Gran acollida obtivo a conferencia do lama Gueshe Tenzing Tamding durante este venres 15 no Centro Cultural de Ponte Caldelas. Alí este discípulo do Dalai Lama explicou que a felicidade non depende de causas externas nin depende doutros senón de cada unha das persoas.
Con esta mensaxe, trasladou os principios do budismo aos asistentes explicando que a causa principal do sufrimento son as mentes enganosas e conflitivas que se centran no apego, o orgullo, os celos, a ira ou o egoísmo. E apuntou que a felicidade se atopa nas mentes positivas que son aquelas que se centran na xenerosidade, a paciencia, o perdón ou na tolerancia.
Actualmente, a residencia principal de Gueshe Tenzing Tamding atópase entre o Mosteiro de Chu Sup Tsang, situado en Ourense, e o Centro Garden Choeling en Menorca, aínda que a maior parte do ano atópase de viaxe por todo o mundo atendendo aos seus miles de discípulos que se reparten por Europa, Asia e América.
Todos os seus discípulos resaltan a súa especial maneira de transmitir o Darma, cun estilo claro e directo. Ao acto asistiu o alcalde de Ponte Caldelas.