Os comuneiros abordan coa Fiscalía os últimos incidentes nos montes pontevedreses
Por Redacción
Os últimos incidentes rexistrados nos montes pontevedreses, entre eles accidentes, aparición de trampas e enfrontamentos entre comuneiros e usuarios de bicicletas, centraron unha reunión celebrada entre a Organización Galega de Comunidades de Montes (ORGACCMM) e o fiscal xefe de Galicia, Fernando Suanzes. O encontro, celebrado na Coruña, tivo como obxectivo abordar asuntos que teñen que ver cos usos que unha parte da cidadanía realiza sobre o monte veciñal en particular e o monte en xeral.
Segundo informou o pontevedrés Claudio Quintillán, responsable da área de comunicación social da organización, os comuneiros trasladáronlle ao fiscal xefe os percances acontecidos e que se lle cargaron as responsabilidades ás comunidades de montes sobre eses feitos, coa "agravante" de que mesmo houbo manifestacións de membros dos corpos e forzas de seguridade e do propio fiscal xefe de Pontevedra, Juan Carlos Aladro que, ao seu xuízo, "desprezan os lexítimos titulares das terras comunitarias, cun descoñecemento absoluto da lexislación vixente en materia de montes, e do Dereito Civil de Galicia".
Os comuneiros aseguran que o fiscal xefe amosou "receptividade" e asumiu o compromiso de dar traslado da situación na vindeira reunión que manteña cos fiscais provinciais e tamén ás consellerías de Medio Rural e Medio Ambiente, que teñen competencias sobre os montes.
Despois da reunión, os comuneiros lembran que o 98% do monte galego "non é de todos, é dos seus lexítimos propietarios, tanto particulares como veciñais en man común" e só o 2% é da Xunta de Galicia, é dicir, público. A pesar diso, os propietarios aseguran que sempre se facilita que o monte se use como lugar de esparexemento, para recollida de cogumelos, para pasear, andar en bicicleta ou para o uso con motos, quads ou a cabalo por parte da sociedade en xeral, sempre "de xeito desinteresado".
"Sempre se mantiveron como abertos para o desfrute de todos e todas, socializando a propiedade para o lecer. Agora ben, o que non procede é atribuirse que é de todos e facemos sobre él o que nos apetece, porque insistimos, non é así", engade Quintillán a través dun comunicado.
Relacionadas:
-
Ciclistas e comuneiros abordarán nunha mesa redonda os "usos e abusos" do monte
Por Redacción |
-
Ciclistas e comuneiros abordarán nunha mesa redonda os "usos e abusos" do monte
Por Redacción |
-
David Cal, Gómez Noya, Lucía Vázquez... todos están contra as trampas para ciclistas nos montes
Por Redacción |
-
Convocan concentracións en Monte Castrove e Pontevedra polas trampas para ciclistas nos montes
Por Redacción |