Substitúen a cuberta do patio do colexio Telleiro, que poñía en risco a seguridade dos escolares
Por Redacción
O Concello de Sanxenxo destinará un orzamento duns 10.000 euros á obra necesaria para substituír a cuberta do patio traseiro do colexio Telleiro, en Noalla, que presenta un avanzado estado de deterioración e pon en perigo a seguridade dos escolares.
A edil de Educación, Sandra Fernández Agraso, explicou que a actuación se demorou porque nun principio confiaba en que a Consellería de Cultura, Educación e Ordenación Universitaria achegase os fondos necesarios para a obra, pois ao tratarse dunha actuación de investimento e non de mantemento a súa execución depende da administración autonómica. Ese diñeiro non chegaba, de modo que decidiron usar fondos municipais.
A actuación demandárona os pais e a dirección do centro en numerosas ocasións durante os últimos anos. Consiste na demolición da chapa metálica existente na cuberta e nun parámetro vertical e a súa substitución por panel sándwich de 30 milímetros de espesor, así como a reposición dunha correa dobre T existente no exterior da cuberta.
Os traballos inclúen tamén o chorreo da estrutura existente con auga a presión e aplicación de imprimación e esmalte. A cuberta está rota, filtra auga e está oxidada, de modo que a concelleira cre que a obra é "urxente e prioritaria" para que o colexio de Noalla ofreza unhas condicións mínimas de seguridade.