Espectacular accidente dun camión na ponte da Illa de Arousa por culpa do vento
Por Redacción
Os refachos de vento de máis de 86 km/h. que sopraron durante a mañá deste mércores 30 na zona de Arousa foron os causantes de que o condutor dun camión que circulaba con dous remolques pola ponte da Illa de Arousa perdese o control do vehículo e terminase impactando contra a varanda.
O camión pertencente a unha empresa de cordelería circulaba con dous remolques de grandes dimensións que, ante o golpe do vento, se escoraron cara á dereita.
Por fortuna, o impacto contra a varanda e contra un farol evitou que caese á auga da ría, aínda que inicialmente temíase que ao exceder a barreira de seguridade correse perigo de desprenderse. O accidente producíase ao redor das 12.00 horas deste mediodía e, desde entón, está a levarse a cabo a retirada do camión coa intervención da Garda Civil de Tráfico, que está a regular o tránsito dos vehículos con retencións na contorna da ponte.
Na zona están operativos tamén efectivos da Policía Local de Vilanova e da Illa e de Protección civil de Vilanova, ademais de persoal de limpeza e mantemento da estrada.
Non se rexistraron feridos e prevese a intervención dun guindastre especial, segundo informa o servizo de Emerxencias do 112, para retirar o camión.