Unha familia de Cambados, intoxicada ao queimar un sillón de plástico nunha cociña económica
Por Redacción
Un matrimonio e a súa filla foron rescatados cando se atopaban en estado inconsciente no interior dunha vivenda situada en Baltar, Castrelo, no municipio de Cambados ás 17.00 horas deste mércores 25 debido á alta acumulación de monóxido de carbono.
Segundo o servizo de emerxencia do 112, o suceso orixinouse, segundo os primeiros datos, pola queima de leña e dun sillón de escuma e plástico nunha cociña económica. Os técnicos sanitarios foron os primeiros en intervir sacando á filla, de 46 anos, da casa e, a continuación, efectivos do servizo municipal de Protección Civil en colaboración coa Garda Civil e técnicos sanitarios lograban evacuar ao pai, de 76 anos, que se atopaba na cociña da vivenda e á nai, tamén da mesma idade, que se achaba nunha habitación da casa.
Mentres os tres membros da familia eran atendidos polo servizo médico, os axentes de Protección Civil procederon a ventilar o inmoble no que, segundo as medicións, os niveis de concentración de monóxido de carbono eran elevados.
A familia foi trasladada en tres ambulancias medicalizadas ao Hospital do Salnés para ser atendidos da intoxicación.