O Concello de Cuntis amence con danos pola entrada de cacos
Por Diego Espiño
Con xanelas forzadas e portas rotas. Así amenceu este sábado o Concello de Cuntis, despois de sufrir durante a noite a actividade dos amigos do alleo.
"Entraron por urbanismo e subiron a alcaldía. Tamén entraron noutras zonas como as oficinas da Policía Local", explicou a PontevedraViva o alcalde de Cuntis, Manuel Campos.
Unha funcionaria alertou da situación ao acudir a abrir o edificio ás 9:00 horas, polo que se chamou rapidamente á Garda Civil.
Tras unha primeira revisión, os ladróns, que esnaquizaron varias portas do interior do edificio, non levaron obxectos de valor: "Non notamos que falten obxectos como ordenadores ou cámaras", sinala Campos.
Con todo o rexedor mostrouse preocupado por outro aspecto ao recoñecer que "non sabemos se levaron expedientes". Un detalle que tentarán comprobar durante os próximos días.