Detido un condutor que se deu á fuga tras arroiar a unha motocicleta en Ribadumia
Por Redacción
A Garda Civil detivo a A.V.A., de 21 anos de idade e veciño de Meaño, como suposto autor dun delito contra a seguridade viaria, de lesións, danos e omisión do deber de socorro.
Segundo informaron fontes oficiais do Instituto Armado, os feitos tiveron lugar ás 18:00 horas deste martes día 3, na estrada provincial EP-9402, no termo municipal de Ribadumia, cando se produciu un accidente de circulación consistente na colisión do turismo Volkswagen Golf, contra un ciclomotor ocupado por dous mozos, que resultaron feridos de carácter leve.
O condutor do citado turismo, tras non respectar a prioridade de paso do ciclomotor e arroialo, deuse á fuga co vehículo do lugar dos feitos.
Tras as investigacións realizadas polo Grupo de Investigación de Accidentes de Tráfico do Subsector de Tráfico da Garda Civil de Pontevedra, localizouse o vehículo accidentado no lugar de Seixiños-Dena, sen ninguén no seu interior.
Carece de permiso de condución ao perder todos os puntos
Continuando coas investigacións os axentes puideron identificar o autor dos feitos referidos o cal carece de permiso de condución ao perder todos os puntos do mesmo e o vehículo, do que non é titular, tampouco ten seguro obrigatorio.
Por todo iso procedeuse á súa detención na noite do mércores, sendo conducido ás dependencias oficiais da Garda Civil para a instrución das correspondentes dilixencias que xunto co detido serán entregadas no Xulgado de Instrución número tres de Cambados.