Pedaladas enerxéticas fan brillar os hórreos de Combarro
Por Redacción
A apertura dunha Oficina da Área de Rehabilitación Integral de Combarro serviu como elemento precursor para desenvolver a proposta Activa Combarro que inclúe diferentes actividades, entre elas, unha orixinal xornada de pedaleo na que participaron numerosos veciños e tamén políticos do Concello de Poio.
A iniciativa realizouse a través da instalación de sete bicicletas na Praza da Rualeira. Alí, os participantes pedalearon durante horas na xornada do sábado coa intención de cargar de enerxía eléctrica as baterías que, unha vez cheas, conectáronse a unhas fontes de iluminación led.
Desta forma, a partir das 21.00 horas deste sábado 31 unha extraordinaria iluminación da zona dos hórreos situados fronte ao mar facíase visible desde diferentes puntos do concello.
Esta proposta ten como obxectivo poñer en valor o conxunto histórico de Combarro e dinamizar esta zona turística, entre outros aspectos, cun plan de rehabilitación que conta cun orzamento que supera os 200.000 euros.