Convocan concentracións en Monte Castrove e Pontevedra polas trampas para ciclistas nos montes
Por Redacción
A aparición nos últimos días de trampas nos camiños do Monte Castrove provocou o enfado dos colectivos ciclistas da provincia. E por iso, a Asociación Pedaladas, coa colaboración de Masa Crítica Pontevedra, vén de convocar dúas concentracións de protesta contra estas prácticas que poden chegar a ser moi perigosas para os deportistas. Serán o próximo domingo 8 de novembro.
A primeira concentración será as 11:15 horas no Monte Castrove, concretamente no aparcamento do campo de golf de Meis que coincide co inicio das rutas BTT marcadas pola Xunta de Galicia.
Os clubs ciclistas da comarca de Pontevedra e O Salnés, desde primeira hora da mañá, subirán ao Monte Castrove por múltiples camiños para facer un recoñecemento da zona e comprobar que non existan trampas polos seus camiños habituais. Así, intentan previr que aconteza "algunha desgracia provocada polas actividades criminais dos que están a poñer estas trampas inxustificables", segundo estes colectivos.
A segunda concentración será as 12:30 horas na praza de España en Pontevedra. Ata alí regresarán parte dos que subirán ata o monte e a eles sumaranse os ciclistas urbanos de Masa Crítica Pontevedra e todos os veciños afectados "pola acción criminal de situar trampas nos montes para evitar que ciclistas e peóns gocen dun patrimonio paisaxístico, cultural e histórico que é de todos os galegos".
E é que recorda que a última trampa atopada estaba moi próxima a unha zona de aproveitamento micolóxico e con castañas. Esta trampa era unha táboa dun metro e medio con cravos camuflada con follaxe, polo que existe moito risco neste monte de ter un accidente grave ao pisar este tipo de trampas.
Por iso, tanto a Asociación Pedaladas como Masa Critica Pontevedra invitan a que calquera persoa que localice unha destas trampas informe das mesmas á Policía Autonómica no teléfono 886206142.
Relacionadas:
-
Os comuneiros abordan coa Fiscalía os últimos incidentes nos montes pontevedreses
Por Redacción |
-
Os ciclistas mobilízanse "por un monte libre de trampas e con bicicletas"
Por Oskar Viéitez |
-
Denuncian tres condutores por non respectar a distancia cos ciclistas na estrada
Por Redacción |
-
David Cal, Gómez Noya, Lucía Vázquez... todos están contra as trampas para ciclistas nos montes
Por Redacción |
-
Masa Crítica denuncia a aparición de trampas para ciclistas no Monte Castrove
Por Redacción |