Rescatan unha persoa que caeu nun pozo de 20 metros en Xeve
Por Redacción
Unha persoa caeu na tarde deste domingo ao interior dun pozo duns 20 metros de profundidade na parroquia de Xeve, pero logrou ser rescatada por varios particulares sen ter que lamentar danos de relevancia.
Segundo informou o Centro de Atención de Emerxencias de Galicia 112, un particular chamou aos servizos de emerxencia pouco antes das 17.30 horas alertando dun incidente rexistrado no lugar de Filgueira, na parroquia de Xeve.
O 112 solicitou a intervención do Corpo de Bombeiros de Pontevedra, pero a súa intervención non foi necesaria porque, xusto cando saían cara ao lugar deuse aviso de que a persoa xa fora rescatada. Aínda así, requiriuse a presenza dos técnicos sanitarios, que atenderon á persoa no mesmo lugar do suceso. Ademais, o 112 informou ás policías Local e Nacional e aos voluntarios de Protección Civil.