O comité de empresa de Cuca optimista tras reunirse cos grupos políticos
Por Oskar Viéitez
Os representantes do comité de empresa de Conservas Cuca mostráronse optimistas tras reunirse cos grupos políticos representados no Parlamento de Galicia.
Logo destes contactos consideran que "si hai vontade e presión política" pódese impedir o peche da factoría de Vilaxoán.
A presidenta do comité de empresa, María José Rey, afirma que conseguiron o compromiso de "todos os partidos, incluso os do Partido Popular" para presentar unha serie de iniciativas parlamentarias nas que instarán ao Goberno da Xunta a que "poñan os medios para que Conservas Garavilla poida reconsiderar a súa decisión" en canto ao anunciado traslado da súa actividade produtiva a O Grove.
As traballadoras e os seus representantes sindicais están convencidos que o traslado suporá a extinción de 200 postos de traballo "nunha comarca que ten a maior taxa de paro de Galicia".
Mentres tanto as traballadoras de Cuca persisten nos labores de vixilancia "de día e de noite" ás portas da factoría de Vilaxoán para evitar o traslado da maquinaria.