Voluntarios da Facultade de Fisioterapia realizaron preto de 400 asistencias este curso
Por Redacción
Preto de 400 asistencias, realizadas por aproximadamente 40 estudantes dos dous últimos cursos do grao en Fisioterapia baixo a coordinación dunha ducia de docentes e egresados. Ese é o balance que acumulan no que vai de curso as unidades de voluntariariado coas que a Facultade de Fisioterapia colabora con diversas probas deportivas e que permiten ao alumnado poñer en práctica todo o aprendido nas aulas.
“Para moitos, é o seu primeiro contacto con pacientes reais, polo que é unha experiencia moi interesante para eles, como demostra o feito de que moitos repitan”, sinala neste senso José Manuel Pazos, coordinador dunhas unidades que este domingo atenderon a preto de 150 persoas no Medio Maratón Cidade de Pontevedra.
UN INTENSO INICIO DE CURSO
Ademais de no Medio Maratón Cidade de Pontevedra e do torneo do Mercantil, os voluntarios de Fisioterapia tamén colaboraron co Desafío Illas Cíes de Vigo, que tivo lugar o 27 de setembro, na XII Carreira Pedestre Concello de Moaña, que tivo lugar ese mesmo día, e co Desafío Boot Campus Race, celebrado en Vigo o 3 de outubro. En total, cinco probas en menos dun mes que confirman o interese que suscitan estas unidades de voluntariado.