A Policía Local sorprende unha muller agredindo un home tras unha forte discusión na rúa
Por Redacción
Axentes da Policía Local detiveron nos últimos días unha muller de 29 anos á que acusan de agredir ao home que a acompañaba pola rúa.
O suceso tivo lugar, segundo informa o corpo policial, o pasado 4 de outubro sobre as catro da madrugada. A parella, que se atopaba no cruzamento de Cobián Roffignac coa rúa Rouco, atopábase no medio dunha forte discusión cando foron vistos por unha patrulla. Estaban forcexando e el estaba en actitude defensiva.
A muller comezou a empuxalo cada vez máis forte, polo que o seu acompañante, de 48 anos de idade, botou a correr en dirección ao centro da cidade sendo perseguido por ela.
Coa axuda doutras patrullas, ambos foron localizados en Benito Corbal, onde os axentes observaron como ela lle agredía, provocándolle lesións no pescozo, peito, brazos e costas e rompéndolle a camisa cos golpes.
Ante esta agresión, a Policía Local procedeu á súa detención e ao seu traslado a dependencias policiais.
OUTRAS ACTUACIÓNS POLICIAIS
Ademais, a Policía Local detivo un home de 38 anos como presunto autor do intento de roubo con forza nunha vivenda da rúa Juan Bautista Andrade. Foi o pasado 14 de outubro cando, sobre as cinco da tarde, o dono do inmoble afirmou que un veciño alertáralle de que unha persoa tentara acceder á súa casa pola parte posterior da mesma facendo un butrón na parede.
No momento de ser detido, o ladrón estaba en posesión dun machada con signos de ser utilizada recentemente e con restos de ladrillo no seu fío, así como dunha lanterna.
Por último, os axentes da Policía Local tamén detiveron, neste caso o pasado 12 de outubro ás 12.45 horas, un mozo de 19 anos como presunto autor do roubo dunha bolsa a unha muller que ía camiñando pola rúa Eduardo Pondal.
Os axentes interceptárono en Ponte Boleira pero logrou darse á fuga e, tras ser perseguido a pé polos policías, foi detido de novo na rúa Avelino Montero Villegas. O mozo recoñeceu ter collido 45 euros do bolso, tras o cal tirouno na rúa Gorgullón. Ao carecer de documentación, foi trasladado a dependencias policiais. Alí tampouco puideron identificalo nin saber se ten domicilio na cidade.