Intentan agredir sexualmente unha moza a plena luz do día na rúa Riestra
Por Redacción
A céntrica rúa Riestra foi escenario, o pasado venres 16 de outubro, dun desagradable episodio que acabou coa detención dun home de 45 anos, acusado de tentar agredir sexualmente a unha moza.
Segundo informa a Policía Local, o incidente produciuse sobre as cinco e media da tarde. A vítima, unha muller de 26 anos, viuse abordada polo presunto agresor mentres paseaba pola rúa. Este, relatou a moza aos axentes, chegou a ameazala á vez que lle realizaba diversos tocamentos nas súas partes íntimas.
Ao resistirse, o home tentou pegarlle unha labazada pero ela logrou esquivala.
A moza comezou a gritar pedindo auxilio e o seu asaltante deuse á fuga. Pero o home foi retido por varias persoas que se atopaban nas proximidades ata que chegaron os axentes da Policía Local.
O detido, que se atopaba visiblemente alterado, foi trasladado inicialmente a un centro médico onde se comprobou que tiña antecedentes por problemas psiquiátricos.
Tras ser atendido polos facultativos, foi conducido ata as dependencias policiais onde quedou retido ata a súa posta a disposición xudicial.