O PP solicita unha comisión de investigación sobre os contratos de Cespa co Concello
![Alejandro](/web/cache/scene/uploads/xornalistas/foto/dee/_S7QytKoutjK3UsovKMnMzytWsi62MjSxUqrKz891Lsov0DEyAC_/_Il61oA_/5624216432-20150128-patxot-alex-espino-002.jpg)
Por Alejandro Espiño
Aclarar os supostos casos de "enchufes" en Cespa por parte de membros do goberno do BNG e de funcionarios municipais. É o obxectivo principal que debe asumir a comisión de investigación que o Partido Popular solicitou este xoves. Independentemente da actuación xudicial, os populares entenden que se debe aclarar a relación entre a empresa e o Concello de Pontevedra.
Segundo Jacobo Moreira, nesta comisión terían que estar presentes todos os grupos políticos da corporación, e débese basear noutras dúas premisas, que o alcalde e os membros do goberno citados no informe policial non poden participar nesta investigación e que o traballo interno debe ser "transparente". Todo iso, dixo o portavoz popular, para "arrojar luz y taquígrafos" sobre este asunto.
Os edís do PP, a pesar de asegurar respectar a presunción de inocencia, entenden "necesaria" esta investigación interna. Especialmente, asegurou Moreira, no caso dunha empresa que é adxudicataria dun dos principais contratos da administración local, o da limpeza viaria e recollida de lixo, cifrado nuns seis millóns de euros anuais; e que asumirá desde este mes tamén o mantemento das zonas verdes da cidade.
O portavoz popular cre que esta comisión permitirá, precisamente, "analizar con detalle" a relación contractual de Cespa co Concello, sobre todo as ampliacións de contrato e as prórrogas concedidas nos últimos anos.
Ante esta situación, Jacobo Moreira afirmou que non é "correcto ni apropiado" que sexan os membros do goberno municipal os que investiguen as supostas irregularidades e asegurou que lle resulta "sorprendente" que o BNG alegue descoñecer a política de contratacións desta empresa porque ese control, sinalou, "debería ser continua" ao ser o goberno municipal o "principal interesado" en como funcionan as empresas que traballan para o Concello.
En todo caso, os populares anunciaron que non levarán este asunto ao próximo Pleno municipal porque o proceso de constitución dunha comisión de investigación "requiere diálogo entre todos los grupos para lograr así alcanzar un acuerdo previo", concluíu Moreira.
Relacionadas:
-
PP e BNG discrepan sobre un posible "pelotazo" nas prórrogas do contrato do lixo
Por Redacción |
-
O xuíz sobresé de forma provisional a causa dos supostos "enchufes" en Cespa
Por Redacción | Creada e actualizada
-
Cespa comezará a encargarse das zonas verdes da cidade antes de que acabe o mes
Por Alejandro Espiño |
-
O Concello nega "rotundamente" estar relacionado con enchufes nas contratacións de Cespa
Por Alejandro Espiño |
-
A xuíza da Operación Patos imputa a Louzán
Por Redacción |