Unión Fenosa distribución investirá 149 millóns de euros en Pontevedra ata 2018
Por Redacción
Unión Fenosa Distribución investirá preto de 34 millóns de euros en 2015 e 115 millóns no trienio 2016-2018 para reforzar a subministración na provincia de Pontevedra. Entre as actuacións previstas para este exercicio destaca a posta en servizo dunha subestación no polígono de Nantes, en Sanxenxo, que dará servizo a 15.000 usuarios.
Unión Fenosa Distribución instalará neste ano preto de 93.000 contadores intelixentes na provincia de Pontevedra, polo que pechará 2015 con preto de 275.000 equipos renovados. É dicir, que o 55% dos clientes domésticos dispoñerán a final de ano dun equipo de telemedida.
Durante 2016, a compañía substituirá outros 93.000 contadores para pechar o exercicio con máis do 75% do parque pontevedrés renovado.
A compañía xestiona na provincia de Pontevedra máis de 15.500 quilómetros de rede de distribución eléctrica, dos que máis de 11.000 son de baixa tensión, máis de 3.900 de media e máis de 600 quilómetros de rede de alta tensión. Ademais, conta con preto de 80 transformadores de alta tensión e máis de 5.400 de media e baixa tensión.