Así será o novo deseño do servizo de Urxencias de Montecelo
Por Redacción
As Urxencias do Hospital de Montecelo cambian o deseño de diversas zonas de espera e estar de pacientes e familiares.
Segundo comunicou o Servizo Galego de Saúde preténdese "transformalas nun espazo que sirva como panca de cambio cara un modelo de prestación de servizo orientado ás persoas e que sexa un referente para a transformación das diferentes salas de espera dos hospitais do Sergas".
Durante estes días mantivéronse distintas reunións entre o xerente do CHOP, José Manuel González Álvarez, responsables do Servizo Galego de Saúde, representantes da empresa adxudicataria do proxecto e tamén responsables dos servizos de Urxencias e Medicina Preventiva e persoal técnico e de mantemento.
Entre outros asuntos se concretou a adaptación do proxecto ao entorno de Montecelo e as fases para o correcto desenvolvemento das obras.
O obxectivo do Sergas con este proxecto é dispor dun modelo xeral das salas de espera e Montecelo será o primeiro hospital de Galicia en ter unhas zonas para os usuarios de Urxencias destas características.
Está previsto que as obras se inicien a mediados do mes de outubro e que estean rematadas ao final de novembro
Procederase a renovación de solos, teitos e paredes, renovarase a iluminación, instalarase novo mobiliario e outros elementos para garantir o confort e a comodidade da espera e tamén outros destinados a facilitar a accesibilidade á información dos usuarios.
As obras realizaranse en diversas fases, para que as molestias de cara aos usuarios do servizo sexan as mínimas posibles. Está previsto que se inicien a mediados do mes de outubro e que estean rematadas ao final de novembro.
Este contrato enmárcase dentro do convenio Innova Saúde, establecido entre o Sergas e o Ministerio de Economía e Competitividade, con financiamento comunitario con Fondos de Desenvolvemento Rexional (FEDER).