Ponte Caldelas precisa máis cartos para non facer unha "auténtica chapuza" na Praza de Abastos
Por Redacción
Creada e actualizada
Creada e actualizada
O Concello de Ponte Caldelas solicitará unha nova subvención para mellorar a Praza de Abastos dacordo cos criterios técnicos e as propostas dos vendedores e usuarios do mercado municipal. Esta decisión tomouse despois de que o alcalde, Andrés Díaz, mantivera varias xuntanzas cos praceiros onde se analizou o proxecto presentado ante a Xunta e onde se constatou a necesidade de facer unha modificación, co conseguinte engadido económico, para instalar un chan antideslizante e fregadeiros de aceiro inoxidable, entre outras melloras.
Segundo manifestou o alcalde, Andrés Díaz: "non executaremos outro proxecto chapuceiro de Perfecto Rodríguez por seriedade e responsabilidade do novo goberno xa que nos acarrearía ter que volver a investir para correxir os erros xa observados. Nós, ao principio, solicitamos por escrito unha prórroga, un aprazamento, que se nos denegou, e despois como foi un reclamo popular ampliouse para todos".
Para argumentar esta decisión, o equipo de goberno remítese a un informe elaborado polo director de obra quen asegura que despois dunha visita á praza de abastos xurde a necesidade, "desde o punto de vista técnico en adaptación á recente normativa de aplicación", de realizar cambios en dúas partidas da memoria valorada, referidas á pavimentación de praza mediante porcelánico antideslizante e á instalación de fregadeiros de aceiro inoxidable adosados á encimeira existente.
Asemade, desde o equipo de goberno aseguran que a empresa adxudicataria está disposta a renunciar a executar o proxecto tal e como está debido a que "sería facer unha auténtica chapuza que suporía ter que facer despois un modificado e gastar máis cartos dos estrictamente precisos", sinala o alcalde.
"Ante este e outros temas, preferimos actuar con seriedade e sentido común e renunciar a esta subvención e volver a solicitala para o vindeiro ano, xa que saen de xeito regular anualmente, e así poder facer unha reforma en condicións", dixo Andrés Díaz.
"Esperemos que Perfecto Rodríguez non dificulte ou obstaculice a súa concesión por parte da Xunta", dixo o alcalde
Por otra parte, o rexedor expresou o seu desexo de que "cando pidamos esta subvención para o vindeiro ano esperemos que Perfecto Rodríguez non dificulte ou obstaculice a súa concesión por parte da Xunta xa que agora parece que ten moita presenza no novo executivo autonómico da man do seu amigo Alfonso Rueda".
Finalmente Andrés Díaz recordoulle a Perfecto Rodríguez que "gobernar non é impor. Este goberno, a diferencia do seu, primeiro escoita aos veciños e aos sectores implicados nos temas que lles afectan e logo decide. En 14 anos que estivo como alcalde xamais fixo unha asemblea, pobo a pobo, para escoitar e coñecer as necesidades dos seus veciños para poder atendelos mellor. Tampouco escoitou aos praceiros", concluíu o alcalde.
PERFECTO RODRÍGUEZ DENUNCIA A "INCAPACIDADE" DO ALCALDE
O goberno local de Ponte Caldelas reacciona así ante as críticas formuladas polo portavoz do grupo municipal do Partido Popular, Perfecto Rodríguez, que lamentou que o Concello perdese unha subvención de 43.538 euros "pola incompetencia do alcalde".
"Andrés Diaz demostra a súa total incapacidade e descoñecemento para a xestión do Concello, perdendo a primeira subvención xa concedida que lle tocou xestionar", sinalou o anterior alcalde, Perfecto Rodríguez.
Segundo o portavoz popular, no goberno tripartito de Ponte Caldelas "contrataron a obra tarde e mal e ao final decidiron perder a subvención".
"Andrés Diaz crese que ser alcalde consiste só en ir de festa en festa repartindo apertas e boas palabras aos veciños, pero de portas cara adentro demostra a súa total incompetencia e descoñecemento para a xestión dos asuntos municipais, que neste caso supón a perda dunha subvención de case 45.000 euros", concluíu Perfecto Rodríguez.