Pau Avellaneda aposta por "acabar con el monocultivo del automóvil" no espazo público
Por Redacción
Unha aposta política clara e contundente por poñer ás persoas como referencia á hora de aprobar políticas urbanísticas e de mobilidade, dotar de respaldo legal ás actuacións e redefinir os valores sociais que fan dos automóbiles o centro da vida nas cidades son o camiño a percorrer polos concellos da provincia que queiran apostar por dar unha nova dimensión ás súas vilas e espazos públicos.
Así o indicaron este mércores os tres ponentes das Xornadas de Mobilidade e Espazos Públicos organizadas pola Deputación de Pontevedra e celebradas no Sexto Edificio do Museo: o doutor en xeografía Pau Avellaneda, o xefe da Policía Local de Pontevedra Daniel Macenlle e o asesor provincial na materia Jesús Fole.
Pola súa banda, o vicepresidente da Deputación, César Mosquera, sinalou no acto de inauguración destas xornadas que gañar o espazo urbano para as persoas supón un difícil camiño.
O catalán Pau Avellaneda indicou que os retos da mobilidade urbana para as próximas décadas pasan por ter en conta variables como a crise económica, o cambio de modelo enerxético ou a necesaria vinculación dos hábitos de mobilidade coa saúde dos cidadáns.
Avellaneda destacou a necesidade de redefinir valores sociais nos que o coche aporta unha suposta superioridade. "Hay que acabar con el monocultivo del automóvil en el espacio público, de manera permanente o temporal, con actuaciones ambiciosas o más baratas. Hay fórmulas para cambiar el aspecto de las ciudades sin gasto económico grande para dar otros usos como el ocio de los niños", finalizou.
Logo das conferencias os participantes nas xornadas realizaron unha visita á cidade de Pontevedra.