Que pode aprender Pontevedra das deputacións de Badaxoz e Sevilla?
Por Redacción
A presidenta da Deputación de Pontevedra, Carmela Silva mantivo este martes unha reunión de traballo co presidente da Deputación de Badajoz, Miguel Ángel Gallardo e o de Sevilla, Fernando Rodríguez Villalobos, co obxectivo de analizar diversos servizos cuxa posta en marcha ou mellora estuda a administración galega.
Silva compartiu o seu interese por algunhas das prestacións que o goberno da institución estremeña desenrola dende hai tempo, como é o caso da central de compras, unha ferramenta desenvolvida co obxectivo de facilitar as compras centralizadas da Deputación de Badaxoz, dos seus entes instrumentais e dos concellos da provincia, para obter mellores condicións en prezo na contratación de bens, servizos ou subministracións, reducindo así o gasto público desde a "responsabilidade social".
A presidenta, acompañada do equipo de técnicos que estes días manterán reunións tanto en Sevilla como en Badaxoz, tamén fixo especial fincapé en coñecer o funcionamento do "Plan Dinamiza", un plan similar ao que o novo goberno provincial pon en marcha na Deputación de Pontevedra, o Fondo Local, que converte aos concellos nos verdadeiros interlocutores para dotarlles de recursos que poidan destinar a tesourería, investimentos e servizos básicos que alcaldesas e alcaldes queiran priorizar nas súas respectivas localidades.
Así mesmo, Carmela Silva interesouse, como xa fixo na súa visita institucional á Deputación de Sevilla, por outros departamentos dentro do novo modelo que está a desenvolver en Pontevedra, especialmente os de Igualdade, Asuntos Municipais da Mocidade o Innovación Tecnolóxica así como o desenvolvemento dos plans de emprego da delegación de Badaxoz, xa que a creación de postos de traballo é o primeiro compromiso que ten o novo Goberno da provincia de Pontevedra.
Carmela Silva tamén agradeceu o recibimento do presidente da Diputación de Sevilla, Fernando Rodríguez Villalobos, e a súa boa disposición a colaborar para implementar na institución pontevedresa as boas prácticas que desenvólvense na capital andaluza.
Silva destacou sobre todo tres aspectos fundamentais como os máis interesantes da visita a institución andaluza. En primeiro lugar, trátase da política de anticipos de tesourería e liquidez aos concellos da provincia sevillana, en segundo lugar, a oficina técnica de asesoramento aos concellos que dispón a Diputación de Sevilla, que ofrece servizos de asistencia xurídica, sobre urbanismo ou de contratación, entre outros temas, "que é algo que xa nos están a demandar os propios concellos da provincia de Pontevedra", subliñou a presidenta.
O terceiro aspecto que destacou Carmela Silva como máis interesante é o servizo de administración electrónica con que conta a deputación andaluza, que é propiedade desta institución e totalmente desenvolvido por eles, e que tamén pon a disposición dos concellos sevillanos.