O mantemento da escola infantil do Revel dispárase pola falta dun plan de urbanización
Por Redacción
A falta de execución do Plan Especial de Dotacións e Infraestruturas no Revel, Vilalonga, está detrás, segundo o Concello de Sanxenxo, dos problemas detectados na escola infantil, de recente construción.
A concelleira de Educación, Sandra Fernández, mantivo unha reunión cos arquitectos responsables do proxecto e a empresa construtora nas instalacións escolares, que sofren habitualmente problemas de cheiros e atascos dos desaugadoiros, entre outras deficiencias.
A maioría destes problemas serán emendados proximamente pola construtora ao ser de orixe estrutural e tendo en conta que a obra foi recepcionada hai só tres anos.
Con todo detrás dos cheiros e atascos atópase a falta de desnivel na zona, xa que o saneamento foi conectado a un pozo facilitado naquel entón polo Concello buscando unha solución técnica que non está a funcionar correctamente.
O proxecto inicial contemplaba que o saneamento da escola infantil se conectase a unha rede que está sen habilitar e nunha estrada que tampouco se construíu.
O problema derivado desta situación radica no encarecemento do mantemento da instalación, polo que o goberno local pediu á empresa construtora que busque solucións para que as arcas municipais teñan que afrontar gastos constantes.
Ademas, sinala o Concello, a empresa comprometeuse a arranxar un problema de humidade no corredor da escola e a buscar solución ás bolsas de auga que se acumulan no patio interior da mesma.