Santos Héctor di que o PP na Deputación "perdeu o rumbo e elixiu a un voceiro que é a voz da caverna"
Por Redacción
O portavoz do grupo socialista na Deputación, Santos Héctor Rodríguez, manifestou a tristeza que lle producen as declaracións de Ángel Moldes, portavoz do PP na institución, en referencia ao Plan de Emprego que o novo goberno provincial aprobará en pleno o próximo día 25.
“Moldes representa o peor da dereita española, unha dereita con claras e trasnoitadas tinguiduras machistas, que carece de argumentos serios e só sabe facer oposición desde a descualificación e o descoñecemento”, dixo Rodríguez.
O portavoz do grupo socialista sinalou que “entendemos que lles moleste que en menos de dous meses o novo goberno puxese en marcha tantas novas políticas pensadas para as persoas, para o interese xeral e non para o particular. Entendemos que lles enfade que dedicásemos tres millóns de euros a crear emprego de calidade, con salarios dignos e non con salarios de miseria que eran os que o goberno de Rafael Louzán defendía. E, ademais, xa anunciamos onte que para o próximo orzamento, o de 2016, haberá un plan de emprego que manterá o novo modelo respectando así a dignidade e os dereitos das traballadoras e os traballadores”.
Santos Héctor engadiu que “instamos a Moldes a que diga os nomes dos concellos da provincia que van renunciar aos empregos que lles corresponden para que, desa forma, as veciñas e veciños deses concellos se decaten de quen son os alcaldes ou alcaldesas que prefiren mantelos no paro. Está claro, o PP perdeu o rumbo e elixiu a un voceiro que é a voz da caverna”, concluíu.
Relacionadas:
-
O PP critica que só dure dous meses o "Plan Carmelita" de emprego da Deputación
Por Oskar Viéitez |
-
O novo plan de emprego da Deputación duplicará o salario que recibirán os seus 1.550 beneficiarios
Por Alejandro Espiño |
-
A Deputación intentará mellorar as condicións dos bolseiros nun novo plan de emprego
Por Oskar Viéitez |