O BNG de Marín cualifica de "reunión de café" o encontro entre Ramallo e Feijóo
Por Redacción
A visita da alcaldesa de Marín, María Ramallo, a Santiago de Compostela para entrevistarse con Alberto Núñez Feijóo, presidente da Xunta de Galicia, provocou a reacción do grupo municipal do BNG ao entender que se tratou dunha "conversación de café" en lugar dunha reunión institucional.
Esta crítica baséase en que Ramallo tratou de novo o centro de saúde e do saneamento, obras que segundo o BNG xa terían que estar finalizadas e que, para os nacionalistas, evidencian a falta de cumprimento con Marín por parte da Xunta.
Desde o BNG critícase que a Consellería de Medio Ambiente non finalizase os proxectos para o saneamento das parroquias do rural e do novo colector xeral, derivados dun convenio asinado coa Xunta en 2010.
O grupo municipal nacionalista critica que nesta reunión non se trataron asuntos prioritarios para Marín como a solución que o goberno de Núñez Feijóo ten previsto levar a cabo cos recheos ilegais do Porto e os postos de traballo que están en perigo; a falta de ambulancia 24 horas en Marín; a seguridade viaria en Ardán ou a situación da frota galega en Mauritania. Temas que foron tratados no Pleno da Corporación, que decidiu a través de acordos unánimos que se instase á Xunta a asumir responsabilidades.
Por outra banda, mostran a súa preocupación pola reforma da avenida de Ourense, arteria principal da vila, xa que o BNG afirma que se descoñece como se vai a abordar e denuncian que María Ramallo entrou en contradicións ao afirmar, hai un mes, que o Concello remitira un estudo a Madrid para que fose tratado o tema polo ministerio de Fomento e agora indica que é a Xunta quen realizou a solicitude a través da consellería de Infraestruturas.
Ante esta situación, os concelleiros frontistas solicitarán unha Xunta de Portavoces para que a alcaldesa informe dos asuntos que tratou co presidente da Xunta.