Usuarios de Ponte Muíños denuncian sabotaxes nos seus coches con cravos e parafusos
Por Redacción
De novo, os usuarios do complexo deportivo Rías do Sur, situado en Ponte Muíños, levaron unha desagradable sorpresa. Na mañá do mércores descubriron que, durante a noite anterior, alguén sementara con cravos e parafusos o aparcadoiro de terra situado á beira das instalacións.
Segundo aseguran as vítimas destas sabotaxes, non é a primeira vez que sucede un episodio deste tipo.
Este aparcadoiro, que é de titularidade municipal, é unha das escasas zonas onde tanto os usuarios da piscina como do centro da asociación Amencer-Aspace -dous equipamentos que reciben centos de visitantes ao día-, poden deixar os seus coches mentres están no barrio.
E parece que tanta afluencia de xente, á vista deste tipo de condutas vandálicas, non é do agrado de todos os veciños.
Un dos afectados, que se puxo en contacto con PontevedraViva para denunciar o ocorrido, relatou como ao chegar ao aparcadoiro viu que o firme de terra estaba cheo de cravos e parafusos de grandes dimensións, tanto na zona pola que circulan os vehículos como na parte reservada para estacionamento.
"Parece que seguimos sen ser ben recibidos por algún veciños, porque non é a primeira vez que se producen sabotaxes e danos nos vehículos", asegura.
Ao ser un aparcadoiro de titularidade municipal e que dá servizo a unhas instalacións tan visitadas por numerosos pontevedreses, os afectados esperan que esta denuncia pública sirva para que a Policía Local "tome nota do que ocorre e se solucione este problema dunha vez".