Bueu recibe a confirmación de Portos para as obras de mellora do mercado tradicional
Por Redacción
O Concello de Bueu recibiu este mércores a confirmación de Portos de Galicia para proceder á contratación das obras de adecuación física e mellora do espazo destinado a mercado tradicional de venda de excedentes da horta, polo que este xoves se comezará co expediente de contratación das obras.
Estas obras están orzamentadas en case 40.000 euros, e contan cunha subvención de 27.408 euros que achega a Consellería de Economía e Industria no marco do programa operativo FEDER Galicia 2007-2013.
En concreto, preténdese eliminar os parasois dos postos, caixas e demais e substituílos por toldos para cubrirse das inclemencias meteorolóxicas, ademais da construción de bancadas para a venda deses produtos, que tamén servirán de bancos cando non haxa mercado.
Segundo apuntou o alcalde buenense, esta iniciativa pretende "poñer orde e estética", ao tempo que será unha forma de que os vendedores comecen a cumprir o decreto de venda directa.