Sanxenxo e O Grove acollerán ‘miniconferencias’ científicas ao aire libre
Por Redacción
A praza Pascual Veiga de Sanxenxo e a rúa Hospital do Grove acollerán este sábado un ‘Punto Científico’, organizado pola Asociación Galega de Comunicación de Cultura Científica e Tecnolóxica, DivulgACCIÓN, un colectivo creado en 2011 por unha trintena de divulgadores científicos, entre os que se atopa o concelleiro de Cultura e Festexos de Sanxenxo, Roberto Carlos Agís.
Trátase dunha actividade que comezará ás 12.00 horas no Grove e ás 17.30 horas en Sanxenxo e que reunirá a sete ou oito persoas (aínda pendente de concretar) que ofrecerán miniconferencias ao aire libre co obxectivo de divulgar o coñecemento científico e tecnolóxico dunha forma amena e gráfica.
As charlas están pensadas como punto de encontro e de debate entre os relatores e as persoas interesadas en acudir a unha actividade que sempre se desenvolve ao aire libre e foxe dos formalismos protocolarios que rodean as conferencias convencionais.