Por seguridade, as obras no colexio Rosalía de Castro do Grove faranse polas tardes
Por Redacción
O xefe territorial de Cultura e Educación en Pontevedra, César Pérez Ares, mantivo este luns unha reunión co equipo directivo e representantes da Anpa do CEIP Rosalía de Castro do Grove co obxectivo de comunicarlles a inmediata adxudicación por parte da consellería das obras de mellora da fachada deste colexio.
Segundo informou a Xunta de Galicia, as actuacións previstas consistirán na reparación de elementos estruturais que, na actualidade, presentan desconchados. Ademais, tamén se levará a cabo ao longo de toda a fachada do seu enfoscado e pintado. "Deste xeito, a fachada quedará totalmente renovada e e garantida a seguridade do centro", engadiu Pérez Ares.
As obras, que contarán cun investimento de 42.000 euros, executaranse con carácter de urxencia ao longo deste curso, polo que se le rogou "comprensión" á comunidade educativa, xa que os traballos se executarán polas tardes e as fins de semana, quedando completamente valada a zona para velar pola seguridade dos menores.
"Este proxecto poderá executarse grazas a fondos aportados dende a Subdirección Xeral de Construcións e Equipamentos da Consellería de Educación, xa que consideramos que son prioritarias, xa que con elas garantiremos a seguridade total do centro", matizou o xefe territorial.
Por outra banda, César Pérez Ares tamén transmitiu á comunidade educativa do CEIP Rosalía de Castro, que as obras de mellora nas vivendas dos mestres terán que ser asumidas por quen ten a competencia sobre as mesmas, é dicir, o concello ou os propios inquilinos, "unha vez que entre ambos cheguen a un acordo".