Ladróns disfrazados de electricistas están actuando en Pontevedra
Por Redacción
Axentes da Policía Nacional pertencentes á Comisaría Provincial de Pontevedra, detectaron a presenza de dous individuos facéndose pasar por técnicos dunha empresa eléctrica visitan as vivendas, coa escusa de revisar o contador da luz e subtraen o diñeiro que os residentes no domicilio teñan nese momento na casa.
Neste caso concreto, denunciado o día 9 de setembro, os residentes nunha vivenda unifamiliar nas inmediacións de Pontevedra, recibían a visita de dous individuos que sen ningún tipo de acreditación, solicitaron o último recibo da luz e unha vez no interior do domicilio tras presuntamente facer algún tipo de revisión solicitaron a cantidade de 115 euros polo suposto servizo e nun descoido subtraeron o sobre de onde a propietaria retirou o diñeiro e que contiña 750 euros.
Desde a Comisaría Provincial de Pontevedra quérese advertir á poboación deste tipo de estafas levadas a cabo por certos individuos que só perseguen o lucro persoal, que os cidadáns comproben antes de abonar algunha cantidade a verdadeira identidade dos supostos técnicos, que insistan en ver a correspondente acreditación e sobre todo que non deixen acceder ao interior da súa vivenda a ninguén sen ter o absoluto convencemento de que se trata dun verdadeiro técnico e non un individuo que ademais de estafarlles póidalles roubar as súas pertenzas.
Sobre todo moito ollo ás persoas maiores que viven soas, que insistan en chamar antes á compañía coa que teñen contratado o servizo, aínda que con iso fagan esperar cinco minutos ao técnico, antes de deixarlle acceder ao interior do seu domicilio.
Ante calquera dúbida non dubiden en chamar ao 091 que se encargará de facer as comprobacións pertinentes para confirmar que hai técnicos desa empresa levando a cabo revisións na zona.