Sete locais participarán na cuarta edición de Cotobade en Tapas
Por Redacción
Os días 11, 12 e 13 de setembro as tapas volverán a reclamar o seu protagonismo en Cotobade. Celebrarase a cuarta edición do certame Cotobade en Tapas no que participarán sete locais repartidos por todo o municipio.
Os locais son Bar a Vosa Taberna (Borela) -gañador da terceira edición-, Bodegón Dios (Tenorio), Bar Kovas (Tenorio), Casa Blanco (As Lagoas, Rebordelo), Bar A Carballeira (Famelga, Aguasantas), Bar Conchi (San Jorge de Sacos) e Café A Chan (Carballedo).
Cunha participación media ao largo destes anos de máis de medio millar de persoas, o Cotobade en Tapas quere volver a revalidar os números de participación e consolidar así unha das citas gastronómicas máis esperadas no concello.
De novo, por 2,50 euros os clientes poderán degustar a tapa proposta por cada local e unha bebida. Os participantes obterán un recordo do seu paso polo concurso no primeiro local onde selen a papeleta de puntuacións, como xa se fixo o ano pasado. Para que a papeleta coa puntuación sexa válida terá que levar os selos de todos os locais participantes e deberán depositala nos petos habilitados en cada un dos locais.
O veredicto farase público o 26 de setembro, día no que se darán os premios e se coñecerá a tapa gañadora.
Para o premio do xurado profesional, este ano elixiuse a catro nenos de entre 10 e 13 anos (Iván Fraguas Porto, Ana Buceta Armada, Martín Ogando Eiro, Lúa Yun Mouriz Vázquez e Alba Ogando Eiro).
Ademais, repetirase o Concurso #SelfieTapa mediante o Facebook de Cotobade en Festas, o cal obtivo unha gran participación o ano pasado. O premio será de 20 euros a gastar no establecemento de onde sexa a tapa da foto gañadora.