O helicóptero "Pegasus" da Garda Civil vixiará a concentración mototurística de Sanxenxo
Por Redacción
A vindeira fin de semana, 12 e 13 de setembro, Sanxenxo acollerá unha nova celebración da Concentración Moto Turística Internacional Rías Baixas que chega xa á súa trixésimo primeira edición e na que se espera a presenza de 12.000 persoas.
A cita, organizada polo Moto Club Amigos da Moto de Sanxenxo, levará consigo un amplo dispositivo de seguridade que se poñerá en marcha para evitar que se rexistren incidentes. Celebrouse unha mesa de coordinación de efectivos na que estivo presente a concelleira de Seguridade Ciudadana, Vanessa Rodríguez, ademais de representantes da Policía Local, a Garda Civil e o Servizo Local de Emerxencias para establecer a intervención dos corpos de seguridade, que reforzarán a súa presenza en Sanxenxo durante os tres días nos que se desenvolverá a concentración.
O posto da Garda Civil de Sanxenxo será reforzado por orde da Subdelegación do Goberno, con seis efectivos. Os axentes deTráfico encargaranse de dar cobertura en materia de seguridade á excursión programada para o domingo. Ademais, o helicóptero "Pegasus" da Garda Civil sobrevoará o termo municipal durante todo o fin de semana coa colaboración dunha ambulancia medicalizada.
A zona urbana de Portonovo, a petición da organización como dos hostaleiros locais, abrirase ao tráfico a través da rúa Rafael Picó e ampliarase ata as 23 horas, ampliándoo dúas horas máis. Desta forma preténdese facilitar a entrada na zona urbana aos participantes na concentración para que poidan achegarse aos establecementos hoteleiros da zona urbana.
A cita moto turística comezará o venres, 11 de setembro, a partir das 17.00 horas, coas inscricións na carpa habilitada para a ocasión no ámbito do campo de Baltar. A cota incluirá unha medalla conmemorativa, refrixerio, menú das ceas do venres e sábado e aperitivo e comida do domingo e o dereito a participar nos sorteos que se celebrarán ao longo do fin de semana.
A primeira xornada desenvolverase coa presenza de dj's invitados e música en directo que servirán de presentación ao público congregado. Ás 20.00 horas dará comezo un espectáculo moteiro 'Show Stump' e ás 22.00 horas está prevista unha de confraternidade nun restaurante do municipio tras a que haberá unha festa na carpa.
O sábado, a partir das 16.00 horas, celebrarase o 'Mercado Moteiro'. Tras a cea nun establecemento local, os participantes regresarán ao recinto para acudir a unha festa na que haberá un concurso de strep tease e camisetas molladas entre os asistentes con premios en metálico para os máis atrevidos e un sorteo continuo deregalos.
O domingo iniciarase a partir das 10.30 horas unha excursión ata Poio e Meaño que partirá do recinto situado en Baltar.