Mans á obra para resolver os problemas da cuberta do CEIP de Chancelas
Por Redacción
As pingueiras e os problemas de humidade no CEIP de Chancelas están en vías de solución, grazas as obras de reposición da cuberta do centro, previstas para o inicio do curso en setembro.
A obra está a supoñer a desmontaxe de todo o material de pranchas de fibrocemento da cuberta así como os paramentos perimetrais da mesma. A nova cubrición é a base de panel sándwich, composto por chapa de aceiro galvanizado de dúas caras.
A intervención, ademais de mellorar as condicións de estanquidade do inmoble, proporcionará un mellor grao de illamento térmico, así como a substitución dos elementos de recollida de auga, canalóns e baixantes. O proxecto contempla tamén o acondicionamento interior do baixo cuberta.
Estes traballos supuxeron un investimento de máis de 197.000 euros, segundo sinalou o delegado territorial da Xunta, José Manuel Cores Tourís, que visitou as obras este xoves xunto o alcalde do municipio, Luciano Sobral.
Ademais destas obras, a Xefatura Territorial de Cultura e Educación leva acometidas nos últimos anos outras melloras no centro como son a instalación do contador do caudal do gasóleo, a reposición de falsos teitos e a reforma da instalación de calefacción.