O PP de Ponte Caldelas atribúe a súa xestión que a depuradora sexa asumida pola Xunta
Por Redacción
O ex alcalde de Ponte Caldelas, Perfecto Rodríguez, voceiro do Partido Popular emitiu un comunicado no que destaca a importancia de que a Xunta de Galicia pase a asumir a explotación da estación depuradora do municipio. Sinala que esta decisión supón un aforro de custos para o Concello e apunta ao feito de que foi na súa etapa como alcalde cando se realizaron as xestións coa Xunta e asinou o convenio co vicepresidente Alfonso Rueda en outubro de 2014.
Rodríguez indica que o actual alcalde só asinou a acta do traspaso da explotación, despois de que a Xunta adxudicase xa o contrato de explotación da EDAR que fora licitado a principios de 2015.
TRABALLADOR DA DEPURADORA
O ex alcalde sinala que descoñece a situación do operario de Viaqua, que traballaba na depuradora e que esixe a subrogación na nova empresa concesionaria contratada pola Xunta. Perfecto Rodríguez, non obstante, afirma que a súa antigüidade non é de máis de 20 anos porque a EDAR foi inaugurada en verán de 2005 e os catro primeiros anos foi xestionada directamente por operarios municipais entre os que non se encontraba este traballador.
O voceiro popular indica que foi a partir de decembro de 2009 cando se contratou a Viaqua a xestión da depuradora e engade que non sabe se xa figuraba no equipo da empresa ou non.